Pas Haxhi Shalës dhe Sabit Januzit, fajësinë para Dhomave të Specializuara në Hagë e ka pranuar edhe Ismet Bahtijari. Fillimisht atij i janë lexuar kushtet e marrëveshjes për pranimin e fajësisë të arritur ndërmjet Bahtijarit dhe Zyrës së Prokurorit të Specializuar, me të cilat u pajtua i akuzuari.

“Gjatë seancave që e kemi bërë më shumë se një vit, ju jeni deklaruar i pafajshëm për akuzat, tani po ju pyes a do të deklaroheni fajtor, a jeni gati të ndryshoni këtë vetëdeklarim”, e pyeti Bahtijarin, kryegjyqtarja Mappie Veldt- Foglia.

Kësaj pyetje iu përgjigj shkurt i akuzuari: “Po, po e ndërroj”.

Pas kësaj, kryetarja e trupit gjykues e pyeti përsëri Bahtijarin për dy pikat e aktakuzës për të cilat kanë rënë dakord me Prokurorinë.

“Pika 2, pengim i personave zyrtarë në kryerjen e detyrave me anë të pjesëmarrjes në një grup mes 5 dhe 12 prillit 2023, vepër penale kjo kundër rendit publik. Si deklaroheni, fajtor apo i pafajshëm?”, pyeti kryegjyqtarja Bahtijanin i cili tha se ndjehet fajtor.

Pas kësaj ajo e pyeti për pikën e 3 të aktakuzës, për frikësim të dëshmitarit në mes të periudhës 5 dhe 12 prill 2023, për të cilën tha se po ashtu deklarohet fajtor.

Në seancën për pranimin e fajësisë, kryetarja e trupit gjykues njoftoi se Bahtijari dhe Zyra e Prokurorit të Specializuar kanë arritur marrëveshje për dënim prej 2 vitesh burgim për të akuzuarin./rtk